Naxçıvan şəhərində COP 29 tədbiri çərçivəsində velosiped zolaqlarının çəkilməsi, regionun ekoloji dayanıqlılıq və yaşıl nəqliyyat sahəsində atdığı mühüm addımların bir nümunəsidir. Bu təşəbbüs, şəhərin iqlim dəyişikliyi ilə mübarizəyə aktiv şəkildə qoşulmaq niyyətini göstərir və əhalini daha ekoloji təmiz nəqliyyat vasitələrindən, xüsusilə velosipedlərdən istifadə etməyə təşviq edir. Belə layihələr şəhər daxilində avtomobil nəqliyyatının azalmasına, tıxacların minimuma enməsinə və ətraf mühitin qorunmasına xidmət edir.

Bu prosesin həyata keçirilməsində Naxçıvan Avtomobil Yolları Dövlət Agentliyi, İcra Hakimiyyəti və Naxçıvan şəhər Yol Polisinin mühüm rolu var. Naxçıvan Avtomobil Yolları Dövlət Agentliyi tərəfindən velosiped yollarının çəkilməsi, həm sakinlərin, həm də turistlərin təhlükəsiz və rahat şəkildə velosipedlə hərəkət etməsinə şərait yaradır. Belə ki, Naxçıvan şəhər Heydər Əliyev prospekti, Əziz Əliyev küçəsi və İstiqlal küçəsi olmaqla 600 metr məsafədə velosipedçilərin təhlükəsiz hərəkəti üçün xüsusi zolaq təşkil olunub. Hazırda işlər davam etdirilir.

Bu və digər layihə ilə bağlı yenilikləri NAYDA-nın rəsmi sosial media platformalarında və veb saytında (nayda.gov.az) izləmək mümkündür.

“Naxçıvan Avtomobil Yolları Dövlət Agentliyi”

publik hüquqi şəxsin mətbuat xidməti

YAXŞI YOL...